最近有朋友同我訴苦，埋怨間屋大裝修搞咗差唔多成5個月先搞掂，而裝修費比預算洗多咗差唔多成10萬。雖然最後都叫做完成，但因為時間同金錢都比預期多，所以都唔開心。其實我自己都有數次大裝修嘅經驗，我覺得裝修預算就好似投資同埋理財咁，要有計劃同埋控制過程。
以下係我總結出來嘅裝修慳錢心得，希望比大家裝修前用嚟參考：
（一）選擇裝修淡季
做裝修一般都唔會係大集團，即係話一間公司入面來來去去都可能得幾個師傅。同一時間太多生意，裝修公司都唔唔做的切，所以如果你真係要裝修，最好係選擇裝修淡季，裝修淡季一般係農曆新年後嘅一個月，呢個時候裝修師傅冇折扣優惠，都會幫你跟足d。
（二）有口碑
最好係幫襯有親朋戚友用過同埋口碑好嘅裝修師傅或公司，起碼你知道手工好唔好，有冇交代。
（三）做比較
就算有人介紹，我都建議你揾起碼3間唔同公司作比較，報下價。一來，係比較過程中你自己都會吸取唔同意見。二來，你可以了解一下唔同師傅嘅實力。我試過有一次裝修邀請一位師傅去我屋企報價，我向個師傅提出唔同要求後，個師傅好多時都係話：「呢樣好難做，不過我盡量同你試下，到時睇下要加幾多錢」，或者講「呢樣嘢要再係出面揾人做」。之後我再揾另一個師傅報價，提出同一樣要求，呢個師傅就講明唔會加錢，同埋話我嘅要求其實係基本，唔需要擔心（最後真係幫幫我搞掂）。所以比較係好重要。
（四）同家人商量
相信屋企裝修對好多人嚟講係其中一件人生大事。既然係大事，大家就最好預先同家人商量清楚裝修要求，再同裝修師傅傾設計。因為事後先再改動唔係咁容易。
（五）留意工程進度
每一兩個星期就最好去下自己個單位留意下個工程進度，見到有唔妥就要馬上請教師傅，以減少因出錯而要修補嘅金錢時間。
（六）做好人
每次上去單位「監督」時，記得要買定蛋撻飲料上去俾d師傅，可以嘅話就最好買幾盒外賣俾師傅做午餐。呢樣我估大家都知點解。
（七）訂造傢俬
你揾裝修師傅訂造傢俬一定係貴好多。整傢俬最好係直接揾口碑好嘅公司減低成本。
（八）預算要鬆動
裝修師傅一般都唔係讀好多書嘅人，好多時都係憑感覺同經驗同你溝通。傾好所有價錢後，你預算都要預鬆動d，因為維修及裝修費用難料，隨時有少少額外開支。
大家有冇試過屋企裝修？歡迎大家留言分享經驗。
